Jer 52 | NdeIBE | STEP | UZedekhiya waba yinkosi eleminyaka engamatshumi amabili lanye, njalo wabusa iminyaka elitshumi lanye eJerusalema. Ibizo likanina lalinguHamuthali indodakazi kaJeremiya waseLibhina.

Jeremiah 52

Ukuwa kweJerusalema

1 UZedekhiya waba yinkosi eleminyaka engamatshumi amabili lanye, njalo wabusa iminyaka elitshumi lanye eJerusalema. Ibizo likanina lalinguHamuthali indodakazi kaJeremiya waseLibhina. 2 Wenza okubi emehlweni kaJehova, njengalokhu okwakwenziwe nguJehoyakhimi. 3 Konke lokhu kwenzakala eJerusalema lakoJuda ngenxa yolaka lukaJehova, njalo ekucineni wabaxotsha phambi kwakhe. Ngalesosikhathi uZedekhiya wahlamukela inkosi yaseBhabhiloni.

4 Ngakho ngenyanga yesificamunye yokubusa kukaZedekhiya, ngosuku lwetshumi lwenyanga yetshumi, uNebhukhadinezari inkosi yaseBhabhiloni, waqubuka lebutho lakhe lonke ukuyahlasela iJerusalema. Bahlala ngaphandle kwedolobho, bakha izinqaba zokulivimbezela kuzo zonke izinhlangothi zalo. 5 Idolobho lavinjezelwa kwaze kwaba ngumnyaka wetshumi lanye kaZedekhiya inkosi.

6 Ngosuku lwesificamunye lwenyanga yesine indlala yayisinzima edolobheni, abantu bengaselakudla. 7 Umduli wedolobho wafohlwa, ibutho lonke labaleka. Basuka edolobheni ebusuku bephuma ngesango eliphakathi kwemiduli emibili, phansi kwesivande senkosi, lanxa nje amaKhaledi ayeligombolozele idolobho. Babaleka beqonde e-Arabha, 8 kodwa ibutho lamaKhaledi laxotshana lenkosi uZedekhiya layamfica emagcekeni aseJerikho. Wonke amabutho akhe ehlukana laye njalo ahlakazeka, 9 yena wathunjwa. Wasiwa enkosini yaseBhabhiloni eRibhila elizweni laseHamathi, lapho eyamgwebela khona. 10 Khona eRibhila inkosi yaseBhabhiloni yabulala amadodana kaZedekhiya emehlweni akhe; yabulala lezikhulu zakoJuda zonke.

11 Emva kwalokho uZedekhiya yamkhupha amehlo, yambopha ngamaketane ethusi, yamusa eBhabhiloni, lapho eyamfaka khona entolongweni kwaze kwafika usuku lokufa kwakhe.

12 Ngosuku lwetshumi lwenyanga yesihlanu, ngomnyaka wetshumi lasificamunye kaNebhukhadinezari inkosi yaseBhabhiloni, uNebhuzaradani umlawuli wabalindi besikhosini, owayesebenzela inkosi yaseBhabhiloni, wafika eJerusalema. 13 Wathungela ithempeli likaJehova ngomlilo, lesigodlo senkosi lezindlu zonke zaseJerusalema. Zonke izindlu eziqakathekileyo wazitshisa. 14 Lonke ibutho laseBhabhiloni elalingaphansi komlawuli wabalindi besikhosini layidiliza yonke imiduli eyayigombolozele iJerusalema. 15 UNebhuzaradani umlawuli wabalindi wathatha abanye babayanga bokucina wabasa ekuthunjweni lalabo ababesele edolobheni, lenengi lezingcwethi kanye lalabo ababehlamukele enkosini yaseBhabhiloni. 16 Kodwa uNebhuzaradani watshiya inengi labantu ababengabayanga bokucina elizweni ukuba basebenze ezivinini lasemasimini.

17 AmaKhaledi abhidliza izinsika zethusi, izidindi ezisusekayo kanye loLwandle lwethusi okwakusethempelini likaJehova bahamba lethusi lonke eBhabhiloni. 18 Bathatha lezimbiza, lamafotsholo, lezindlawu lemiganu yezichelo, lezinditshi lazo zonke izitsha zethusi ezazisetshenziswa enkonzweni yasethempelini.

19 Umlawuli wathatha izinditshi, izitsha zokutshisela impepha, imiganu yezichelo, izimbiza, izinti zezibane, izinditshi lemiganu okusetshenziswa kuminikelo yokunathwayo konke okwakwenziwe ngegolide elihle langesiliva.

20 Ithusi elalivele ezinsikeni ezimbili, eloLwandle lelezinkunzi zethusi ezilitshumi lambili ezazingaphansi kwalo kanye lelezidindi ezisusekayo inkosi uSolomoni ayekwenzele ithempeli likaJehova, lalingeke lilinganiswe.

21 Insika ngayinye ukudepha kwayo kwakuzingalo ezilitshumi lesificamibili, ubuqatha buzingalo ezilitshumi lambili, uhlonzi luyiminwe emine njalo ilomwolo. 22 Isiduku sethusi phezu kwenye insika sasizingalo ezinhlanu ukudepha kwaso njalo siceciswe ngobufikifiki lamaphomegranathe ethusi indawo yonke. Enye insika, lamaphomegranathe ayo, layo yayinjalo. 23 Emaceleni kwakulamaphomegranathe angamatshumi aficamunye lesithupha; esewonke amaphomegranathe ayengaphezu kobufikifiki obabuzungezile, ayelikhulu.

24 Umlawuli wabalindi wathumba uSerayiya induna yabaphristi, loZefaniya umsekeli wakhe kanye labalindi bomnyango abathathu.

25 Kulabo ababelokhu besedolobheni wathatha isikhulu esasiphethe amadoda empi, labeluleki basesikhosini abayisikhombisa. Wathatha lomakhelwane owayeyinduna eyayilawula ukubuthwa kwabantu elizweni kanye labanye abantu bakhe abangamatshumi ayisithupha ababeficwe edolobheni. 26 UNebhuzaradani umlawuli wathatha bonke wabasa enkosini yaseBhabhloni eRibhila. 27 Khona eRibhila, elizweni laseHamathi, inkosi yababulala. UJuda wahamba kanjalo ekuthunjweni, khatshana lelizwe lakhe. 28 Nanka amanani abantu uNebhukhadinezari abasa ekuthunjweni: ngomnyaka wesikhombisa, amaJuda ayizi-3,023;

29 ngomnyaka kaNebhukhadinezari wetshumi lesificamibili, abantu beJerusalema abangama-832;

30 ngomnyaka wakhe wamatshumi amabili lantathu, amaJuda angama-745 asiwa ekuthunjweni nguNebhuzaradani umlawuli wabalindi ekubusweni kwezizwe ezinengi. Bebonke kwakungabantu abayizi-4,600.

Ukukhululwa kukaJehoyakhini

31 Ngomnyaka wamatshumi amathathu lesikhombisa uJehoyakhini inkosi yakoJuda esekuthunjweni, ngomnyaka u-Evili-Merodaki aba yinkosi yaseBhabhiloni ngawo, wakhulula uJehoyakhini inkosi yakoJuda, wamkhupha entolongweni ngosuku lwamatshumi amabili lanhlanu lwenyanga yetshumi lambili.

32 Wakhuluma laye ngomusa, wamnika isihlalo sokuhlonitshwa esasingaphezu kwezamanye amakhosi ayelaye eBhabhiloni. 33 Ngakho uJehoyakhini wakhupha izigqoko zakhe zasentolongweni, wadla lenkosi izikhathi zonke okwempilo yakhe yonke. 34 Nsuku zonke inkosi yaseBhabhiloni yanika uJehoyakhini isabelo esimisiweyo malanga wonke empilweni yakhe, kwaze kwafika ilanga lokufa kwakhe.